மகாராஷ்டிர மாநிலத்தில், நாளை அமைச்சரவை விரிவாக்கம் செய்யப்பட உள்ளதாக தகவல் வெளியாகி உள்ளது.
மகாராஷ்டிர மாநில முதலமைச்சராக இருந்த சிவசேனா கட்சித் தலைவர் உத்தவ் தாக்கரேவுக்கு எதிராக போர்க்கொடி தூக்கிய அக்கட்சி மூத்தத் தலைவர் ஏக்நாத் ஷிண்டே, தனது ஆதரவு எம்எல்ஏக்களை திரட்டிக் கொண்டு பாஜகவுடன் கூட்டணி வைத்தார்.
இதனால் அதிருப்தி அடைந்த உத்தவ் தாக்கரே, வேறு வழியில்லாமல், முதலமைச்சர் மற்றும் எம்எல்சி பதவியை ராஜினாமா செய்தார். தொடர்ந்து, பாஜகவுடன் கூட்டணி அமைத்து, சிவசேனா அதிருப்தித் தலைவர் ஏக்நாத் ஷிண்டே மகாராஷ்டிர மாநிலத்தில் ஆட்சி அமைத்துள்ளார்.
கடந்த ஜூன் மாதம் 30 ஆம் தேதி முதலமைச்சராக ஏக்நாத் ஷிண்டே பதவி ஏற்ற நிலையில், துணை முதலமைச்சராக, தேவேந்திர பட்னவிஸ் பதவி ஏற்றனர். அரசு அமைந்து 40 நாட்கள் ஆன நிலையில், அமைச்சரவை இதுவரை விரிவாக்கம் செய்யப்படவில்லை.
இந்நிலையில், மகாராஷ்டிர மாநிலத்தில் நாளை அமைச்சரவை விரிவாக்கம் செய்யப்பட உள்ளதாக தகவல் வெளியாகி உள்ளது. முதலமைச்சர் ஏக்நாத் ஷிண்டே தலைமையிலான அமைச்சரவையில், பாஜக எம்எல்ஏக்கள், சந்திரகாந்த் பாட்டீல், சுதிர் முங்கண்டிவார், ஆர் விகே பாட்டீல், கிரிஷ் மகாஜன் மற்றும் சுரேஷ் காடே ஆகியோர் அமைச்சர்களாக பதவியேற்க உள்ளதாக தகவல் வெளியாகி உள்ளன.
இதே போல், ஏக்நாத் ஷிண்டே தரப்பில், உதய் சமந்த், குலாப்ராவ் பாட்டீல் மற்றும் சந்தீபன் பூமாரே ஆகியோர் அமைச்சர்களாக பதவி ஏற்க இருப்பதாக கூறப்படுகிறது. துணை முதலமைச்சர் தேவேந்திர பட்னவிசுக்கு, உள்துறை இலாகா அளிக்கப்பட இருப்பதாக தகவல் வெளியாகி உள்ளது.
கடந்த சில நாட்களாக, மகாராஷ்டிர மாநில அமைச்சரவை விரிவாக்கம் தொடர்பாக, முதலமைச்சர் ஏக்நாத் ஷிண்டே, துணை முதலமைச்சர் தேவேந்திர பட்னவிஸ் ஆகியோர், தலைநகர் டெல்லியில் முகாமிட்டு, பாஜக மூத்த தலைவர்களை சந்தித்து பேசினர். தற்போது அமைச்சரவை விரிவாக்கம் தொடர்பாக இறுதி முடிவு எடுக்கப்பட்டு உள்ளதாகத் தெரிகிறது. இதன்படியே நாளை அமைச்சரவை விரிவாக்கம் செய்யப்பட உள்ளது குறிப்பிடத்தக்கது.
முன்னதாக, டெல்லியில் மும்பைக்கு திரும்பிய துணை முதலமைச்சர் தேவேந்திர பட்னவிஸ் செய்தியாளர்களிடம் கூறுகையில், “நீங்கள் கற்பனை செய்யும் நேரத்திற்கு முன்பாகவே அமைச்சரவை விரிவாக்கம் செய்யப்படும்” எனத் தெரிவித்தார்.