தமிழகத்தில் வடகிழக்கு பருவமழை தீவிரமடைந்துள்ளது. இதனால், மாநிலத்தில் பல்வேறு மாவட்டங்களில் கனமழை பெய்து வருகிறது. சீர்காழி பகுதியில் கடந்த 122 ஆண்டுகளில் இல்லாத அளவிற்கு 44 செ.மீ அளவிற்கு மழை பெய்துள்ளது. கனமழை காரணமாக தமிழ்நாட்டின் பல்வேறு மாவட்டங்களில் பள்ளி, கல்லூரிகளுக்கு விடுமுறை அறிவித்து மாவட்ட ஆட்சியர்கள் உத்தரவிட்டுள்ளனர்.
சென்னையை பொறுத்தவரை நேற்று நள்ளிரவு முதலே இடியுடன் கூடிய கனமழை பெய்து வருகிறது. விடிய விடிய பெய்த மழை, காலையிலும் தொடர்ந்து நீடித்து வருகிறது. சேப்பாக்கம், மயிலாப்பூர், திருவல்லிக்கேணி, பட்டினப்பாக்கம், எம்.ஆர்.சி நகர், எழும்பூர், வேப்பேரி உள்ளிட்ட பகுதிகளில் இன்று காலை பரவலாக இடி, மின்னலுடன் மழை பெய்து வருகிறது. சென்னையில் வழக்கமாக பெய்யும் பருவமழையின் அளவை விட கடந்த 2 நாட்களில் பெய்த மழை 12 சதவீதம் அதகரித்துள்ளதாக தெரிவிக்கப்பட்டுள்ளது.
அடுத்த 3 மணி நேரத்திற்கு சென்னை, செங்கல்பட்டு, திருவள்ளூர், காஞ்சிபுரம் உள்ளிட்ட 16 மாவட்டங்களில் இடியுடன் கூடிய மிதமான மழைக்கு வாய்ப்பிருப்பதாக சென்னை வானிலை ஆய்வு மையம் எச்சரிக்கை விடுத்துள்ளது.
இந்த நிலையில், கனமழை காரணமாக சென்னை விமான நிலையத்தில் 8 விமான சேவைகள் ரத்து செய்யப்பட்டுள்ளன. மதுரை, ஐதராபாத், கர்னூல் உள்ளிட்ட இடங்களுக்கு செல்லும் விமான சேவைகள் ரத்து செய்யப்பட்டுள்ளன. சென்னையில் இருந்து நேற்று மாலை 5:10 மணிக்கு மதுரை செல்ல இருந்த ‘இண்டிகோ ஏர்லைன்ஸ்’ பயணிகள் விமானமும், மதுரையிலிருந்து இரவு 8:30 மணிக்கு சென்னை வர வேண்டிய ‘இண்டிகோ ஏர்லைன்ஸ்’ விமானமும் ரத்து செய்யப்பட்டன. துாத்துக்குடியில் இருந்து மாலை 5:30 மணிக்கு சென்னை வந்து சேர ‘இண்டிகோ ஏர்லைன்ஸ்’ விமான சேவையும் ரத்து செய்யப்பட்டது.
மேலும், மோசமான வானிலை காரணமாக சென்னை விமான நிலையத்தில் இருந்து பல விமானங்கள், தாதமாக புறப்பட்டு சென்றன. சென்னையில் இருந்து லண்டன் செல்லும் ‘பிரிட்டிஷ் ஏர்வேஸ்’ விமானம், ஆறு மணி நேரம் தாமதமாக புறப்பட்டு சென்றது. திருச்சி, ஷீரடி, கோவா, மும்பை, ஹாங்காங் போன்ற இடங்களுக்கு செல்ல வேண்டிய விமானங்களும் ஒரு மணி நேரம் முதல் இரண்டு மணி நேரம் வரை தாமதமாக புறப்பட்டு சென்றன. விமானங்கள் தாமதம், ரத்து பற்றிய தகவல்கள் முன்கூட்டியே பயனிகளுக்கு தெரிவிக்கப்பட்டதால், சிரமங்கள் தவிர்க்கப்பட்டதாக தெரிவிக்கப்பட்டுள்ளது.