வாசகர்களை, எழுத்தாளர்களாக, பங்களிப்பாளர்களாக மாற்றும் விகடனின் ‘My Vikatan’ முன்னெடுப்பு இது. இந்தக் கட்டுரையில் இடம்பெற்றுள்ள கருத்துகள் அனைத்தும், கட்டுரையாளரின் தனிப்பட்ட கருத்துகள். விகடன் தளத்தின் கருத்துகள் அல்ல – ஆசிரியர்
“ஒரு கலைஞன் என்பவன் வெறும் கைதட்டலுக்காக மட்டும் வாழ்பவனா? . அல்லது அவன் மறைந்த பிறகும் ஒரு தலைமுறைக்குத் தேவையான ஆக்சிஜனைத் தருபவனா?” இந்த ஒற்றைக் கேள்விக்குத் தமிழ் சினிமா தந்த ஆகச்சிறந்த விடை: சின்னக் கலைவாணர் விவேக்.
“மனுஷன் செத்ததுக்கு அப்புறம் மண்ணுக்குப் போவான்… ஆனா இவரு மட்டும் தான் மண்ணுக்குள்ள ஒரு கோடி மரங்களை விட்டுட்டுப் போயிருக்காரு!” – ஒரு ரசிகனின் இந்த வைரல் வரிகள் விவேக் எனும் ஆளுமையின் சுருக்கமான அடையாளம்.
அவர் மறைந்து சில ஆண்டுகள் ஓடிவிட்டன. ஆனாலும், இன்றும் தொலைக்காட்சியைப் போட்டால் ஏதோ ஒரு சேனலில் அவர் நம்மைச் சிரிக்க வைத்துக் கொண்டுதான் இருக்கிறார். ஆனால், விவேக் என்ற கலைஞனின் வெற்றி வெறும் ‘சிரிப்பில்’ மட்டும் இல்லை; அவர் நம் வீட்டு வரவேற்பறைக்குள் அமர்ந்து கொண்டு, நம் சமூகத்தின் புரையோடிப் போன மூடநம்பிக்கைகளைத் தன் நகைச்சுவை அறுவை சிகிச்சையால் கூசாமல் அகற்றியதில்தான் இருக்கிறது.
ஈடு செய்ய முடியாத வெற்றிடம்
இசைஞானி இளையராஜாவின் பாராட்டு விழாவில் சூப்பர் ஸ்டார் ரஜினிகாந்த் ஒரு விஷயத்தை அழுத்தமாகப் பதிவு செய்தார்: “சினிமா துறையில் இரண்டு பேரின் இழப்பை எதனாலும் ஈடு செய்யவே முடியாது… ஒன்று நடிகர் விவேக், மற்றொன்று பாடகர் எஸ்.பி.பி!”
சூப்பர் ஸ்டாரே ‘ஈடு செய்ய முடியாது’ என்று விவேக்கின் பெயரைச் சொல்லக் காரணம், அவர் வெறும் காமெடியன் அல்ல; அவர் நம்மைச் சிந்திக்கத் தூண்டிய ஒரு ‘சமூகச் சீர்திருத்தவாதி’.
மூடநம்பிக்கை எனும் மைல்கல்!
விவேக்கின் நகைச்சுவை என்பது வெறும் சிரிப்பல்ல, அது ஒரு பகுத்தறிவு அறுவை சிகிச்சை. சாலையில் கிடக்கும் ஒரு சாதாரண ‘மைல்கல்’ (Kilometre stone)-க்கு யாரோ ஒருவர் மஞ்சள் துணியைச் சுற்ற, அதை ‘குலதெய்வம்’ என நினைத்து ஊரே கும்பிடும். அப்போது விவேக் வருவார்… “டேய்… இது எவ்ளோ தூரம்னு காட்டுற கல்லுடா!” என்று அந்த மூடநம்பிக்கையின் முகத்திரையைக் கிழிப்பார்.
மஞ்சள் துணி போர்த்தினால் எதையும் தெய்வமாக்கிவிடும் நமது அறியாமையை, அந்த ஒற்றை நகைச்சுவைக் காட்சி மூலம் அவர் வெளிச்சம் போட்டுக் காட்டினார். இதுதான் விவேக் பாணி; சிரிப்புச் செடியை நட்டுக்கொண்டே சிந்தனை மரத்தை வளர்ப்பது!
ஒரு கோடி கனவு: மரங்களை நேசித்த மனிதன்
இந்திய சினிமா வரலாற்றில் ஒரு நடிகர், தன் ரசிகர்களை மரம் நடச் சொல்லி ஒரு ‘பசுமைப் புரட்சியை’ முன்னெடுத்தது விவேக் அவர்களால் மட்டும்தான் சாத்தியமானது. அப்துல் கலாம் ஐயாவின் மீது அவர் வைத்திருந்த பற்று, அவரை ஒரு சமூகத் தூதுவனாக மாற்றியது. இன்று கோடை வெயிலின் உச்சத்தில், எங்கோ ஒரு சாலையோரத்தில் அடர்த்தியான மர நிழலில் ஒதுங்கும் வழிப்போக்கன், அறியாமலேயே விவேக்கிற்கு ஒரு நன்றியைச் சொல்லிக் கொண்டிருக்கிறான். மௌனமான நந்தவனம்…
விவேக்கின் தனிப்பட்ட வாழ்க்கை பெரும் சோகங்களைச் சுமந்தது. தன் ஒரே மகனை இழந்த போதும், அந்தத் துயரத்தை வெளியே காட்டாமல் ஊருக்காகச் சிரிப்பை விநியோகித்த அந்த ‘மகா கலைஞன்’, தன் ஆழ்ந்த சோகத்தை மறைக்கத்தான் அத்தனை மரங்களை நட்டாரோ என்னவோ? ஒவ்வொரு மரமும் அவருக்கு ஒரு குழந்தையைப் போலத்தான் இருந்தது.
நிழல் தரும் நினைவுகள்!
ஏப்ரல் 17, 2021. இந்தத் தேதியில் ஒரு பெரும் சிரிப்புச் சத்தம் மௌனமானது. ஆனால், மரங்கள் சாய்வதில்லை; அவை விதைகளாக மாறுகின்றன. விவேக் என்ற மரம் இன்று நம்மிடையே இல்லை. ஆனால், அவர் நட்டுச் சென்ற லட்சக்கணக்கான மரங்களும், அவர் விதைத்த பகுத்தறிவுச் சிந்தனைகளும் இன்றும் வளர்ந்து கொண்டே இருக்கின்றன.
இனிமேல் நீங்கள் ஒரு மரத்தின் நிழலில் ஒதுங்கும் போது கவனித்துப் பாருங்கள்… அந்த இலைகளின் அசைவில் விவேக்கின் அந்தத் தத்துவச் சிரிப்பு நிச்சயம் ஒலிக்கும்!
விகடனில் உங்களுக்கென ஒரு பக்கம்…
உங்கள் படைப்புகளைச் சமர்ப்பிக்க – [email protected] என்ற மின்னஞ்சலுக்கு அனுப்புங்கள்!
ஏதோ ஓர் ஊரில், எங்கோ ஒரு தெருவில் நடந்த ஒரு விஷயம்தான் உலகம் முழுக்க வைரலாகிறது. உங்களைச் சுற்றியும் அப்படியொரு வைரல் சம்பவம் நடந்திருக்கலாம்… நடந்துகொண்டிருக்கலாம்… நடக்கலாம்..! அதை உலகுக்குச் சொல்வதற்காகக் களம் அமைத்துக் கொடுக்கிறது #MyVikatan. இந்த எல்லையற்ற இணையவெளியில் நீங்கள் செய்தி, படம், வீடியோ, கட்டுரை, கதை, கவிதை என என்ன வேண்டுமானாலும் எழுதலாம். ஃமீம்ஸ், ஓவியம் என எல்லாத் திறமைகளையும் வெளிப்படுத்தலாம்.