பெங்களூரு,
உடுப்பி மாவட்டத்தில் அரசு பி.யூ.கல்லூரியில் முஸ்லிம் மாணவிகள் ஹிஜாப் அணிந்து வந்தனர். ஹிஜாப் அணிந்து வகுப்புக்கு வர கல்லூரி முதல்வர் தடை விதித்தார். இதையடுத்து இந்த விவகாரம் விஸ்வரூபம் எடுத்து மாநிலம் முழுவதும் போராட்டம் நடந்தது.
இதுதொடர்பாக மாணவர்கள் கடந்த 8-ந் தேதி போராட்டம் நடத்தினர். இதில் மாநிலத்தின் பல்வேறு பகுதிகளில் வன்முறை ஏற்பட்டது. இதையடுத்து பதற்றம் ஏற்பட்டதால் பள்ளி-கல்லூரிகளுக்கு விடுமுறை அறிவிக்கப்பட்டது. கர்நாடக ஐகோர்ட்டு மாணவர்கள் மத அடையாள ஆடைகளை அணிந்து வகுப்புக்கு வர தடை விதித்து உத்தரவிட்டது.
இதையடுத்து முதல் கட்டமாக உயர்நிலை பள்ளிகள் நேற்று திறக்கப்பட்டது. இந்த நிலையில் கல்லூரிகளை திறப்பது குறித்து முதல்-மந்திரி பசவராஜ் பொம்மை தலைமையில் பெங்களூருவில் நேற்று ஆலோசனை நடைபெற்றது.
இதில் போலீஸ் மந்திரி அரக ஞானேந்திரா, பள்ளிக்கல்வித் துறை மந்திரி பி.சி.நாகேஸ் உள்பட உயர் அதிகாரிகள் கலந்து கொண்டனர். இதில் பி.யூ. கல்லூரிகள் மற்றும் பிற கல்லூரிகளை 16-ந் தேதி (நாளை) முதல் திறப்பது என்று முடிவு செய்யப்பட்டது.